Die aanbieders van Radiokansel, het na hulle
maandelikse kerkbesoek, waar hulle bewus
geword het van die nood van ander, besluit
om iets aan die saak te doen. Op 16 Desember
het ‘n aantal aanbieders en ander
personeellede van Radiokansel deelgeneem aan
‘n aksie wat hoop aan die hopeloses, liefde
aan die wat weinig liefde ontvang en sorg
aan die sorg behoeftiges gebring het en
daardeur gepoog om vir hulle ‘n reisgenoot
in hul soeke na sinvolheid te wees.
Daar was musikante wat deur middel van sang
die boodskap van hoop oorgedra het en ook
gesorg het vir voedsel na liggaam en gees.
Ons doel was nie net om hoop en vermaak te
verskaf nie, maar veral om die boodskap oor
te dra dat God vir die behoeftiges en armes
ook omgee en sorg.
Aangesien dit slegs ‘n paar dae voor die
herdenking van Christus se geboorte, wat
gesimboliseer word deur geskenke en
familiebyeenkomste, was, het die
Radiokansel-aanbieders familie geword vir
die meer as 115 behoeftige mense deur na
hulle te luister, met hulle te praat, saam
met hulle te bid en berading te gee.
Vir my was die hoogtepunt om die vreugde en
blydskap te sien toe ons vir almal
geskenkies uitgedeel het. Dit het voorwaar
die dankbaarheid en waardering gesimboliseer
van dit wat Radiokansel vir hulle beteken
het.
