In ons mooi land word ons daagliks
gekonfronteer met geweld, misdaad, armoede,
korrupsie…
Al hierdie dinge is nie nuut in die wêreld
nie. Dawid vertel ons in Psalm 22 hoe hy
deur sy vyande getraumatiseer is. Hulle het
hom verbaal en fisies aangeval en God
gelaster. Hoe het hy die trauma hanteer?
In sy skok en ontsteltenis het hy gevlug. Hy
het dodelik moeg en siek geword. In sy
depressie het hy gedink: Hierdie mense het
die mag om my te vernietig; ek is soos ‘n
wurm: magteloos, onveilig, hopeloos: en God
is afwesig. Die Gees van God het Dawid egter
verseker: God is die lewende, betroubare,
betrokke almagtige Verbondsgod! Hy gee om,
luister, help en verlos jou! Die Heilige
Gees het sy gedagtes vernuwe: God is by jou
in jou nood!
Hoe kan jy weet dat jy nie alleen is in
trauma en swaarkry nie? Deur God se enigste
Seun uit die stam van Dawid. Jesus het deur
lyding, geweld, korrupsie en trauma gegaan
sodat ons kon verstaan dat God ons waarlik
lief het.
Jesus is ook deur God verlaat – sodat ons
daardie hel nooit hoef te beleef nie. Dis
maklike woorde om te sê en slegte dinge
gebeur nogsteeds met God se kinders, want
mense het nogsteeds hulle eie wil. Wat jou
posisie as kind van God, anders maak as
ander mense in ‘n tyd van trauma, is dat jy
kan vashou aan die belofte van die kruis en
die leë graf. God het jou nie vergeet nie,
al voel dit soms so. Daardie gevoel is ‘n
leuen wat jou omstandighede net vererger.
Die bewys daarvoor is Jesus se kruisdood en
opstanding, die perfekte offer wat vir jou
sonde gebring is.
Jesus het gekom sodat ons nooit hopeloos,
verlate en wanhopig hoef te wees nie. Hou
vas aan God se onverskrokke liefde! Hy’t sy
Seun verlaat sodat jy dit nooit hoef te
beleef nie.
Dr.
Vorster Combrink (Bestuurder
Beradingsafdeling)
Die beradingsdiens van Radiokansel word
bestuur deur ABBO (Assosiasie vir Bybelse
Berading en Opleiding. Navrae oor ABBO se
beradingskursusse is beskikbaar op
www.abbo.org.za of by (011) 886-7414.
