Christene en
nie-Christene in Suid-Afrika ly finansieel
weens die wêreldwye resessie. Party mense sê
vir my dat hulle desperaat word en drasties
wil optree.
Armoede is relatief. Mense kyk na diegene
wat op die oog af finansieel beter daaraan
toe is as hulself, en voel dan arm. Hulle
kyk baie min na die ander kant, en tel hul
seëninge deur te erken dat daar baie meer
mense is wat baie armer as hulself is.
My raad is om die voorbeeld te volg van die
arm weduwee in Lukas 21:1-4, van wie Jesus
gesê het: “Dit verseker Ek julle: Hierdie
arm weduwee het meer ingegooi as al die
ander. Hulle het almal iets uit hulle
oorvloed in die offergawekis gegooi, maar sy
het in haar gebrek alles ingegooi wat sy
gehad het om van te lewe.”
Hierdie arm weduwee het dit gedoen omdat sy
al haar vertroue in God geplaas het, soos
wat Jesus ons in Matteus 6:30 beveel om te
doen: “As God dan die gras van die veld, wat
vandag nog daar is en môre verbrand word, so
versier, hoeveel te meer sal Hy dan nie vir
julle sorg nie, julle kleingelowiges?” In
Spreuke 21:13 lees ons: “As jy jou ore sluit
vir die hulpgeroep van ‘n arm mens, sal jy
ook nie antwoord kry as jy roep nie.” En in
Spreuke 22:9: “Wie mededeelsaam is, word
geseën, want hy gee van sy kos vir arm
mense.”
Tel jou seëninge, net soos die arm weduwee,
en deel dit met diegene wat slegter daaraan
toe is as jy.
