Ons spandeer baie tyd om oor die belangrikheid van geloof en ons
vertroue op God te praat, maar vandag wil ek graag 'n ander vraag vra:
Is jy daarvan bewus dat God in jou glo? Ek is nie hier besig om 'n
vreemde dogma te verkondig nie, maar wel die feit dat God jou nie net
liefhet nie, maar dat Hy ook van jou hou, jou geniet, vir jou net die
beste wil hê en glo in jou vermoë om 'n uitsonderlike lewe te lei!
As God jou so lief het en jou soveel respekteer, het die tyd dalk
aangebreek om jou opinie oor jouself in lyn te bring met God se opinie
oor jou. Elke mens het 'n "selfbeeld" wat die fundamentele stoorkamer is
van dit wat hy/sy oor homself/haarself waarneem en van hom – of haarself
dink. Let op dat ek dit die oënskynlike waarde, en nie die werklike
waarde nie, noem. Dinge wat ons hoor of ervaar, kan die manier waarop
ons oor onsself dink, affekteer. Die probleem ontstaan wanneer ons glo
dat dinge wat met ons in die verlede gebeur het, ons nutteloos en
waardeloos maak. As God ons waardig geag het om Sy liefde te ontvang,
dan sou dit dom van ons wees om dit in twyfel te trek. Tog raak ons
dikwels moedeloos en verval in die versoeking om toe te gee aan hierdie
aftakelende emosies.
'n Motor het 'n brandstoftenk, maar kan net funksioneer as daar wel
brandstof in die tenk is. Die werkverrigting van die motor hang ook af
van die gehalte van die brandstof. As die brandstof van 'n Formule 1
motor onvoldoende of van lae gehalte is, sal die motor, ten spyte van sy
gevorderde tegnologiese onderbou, maar taamlik nutteloos wees. So ook,
sal al ons talente en potensiaal nie tot volle wasdom kom, as ons
selfbeeld swak, of ons selfrespek onvoldoende is nie.
Die meeste van ons se ID-foto’s is maar taamlik onvleiend. Alhoewel die
foto 'n beeld van jou is, is dit nie 'n refleksie van hoe jy altyd daar
uitsien nie. Dit is 'n beeld van ons op 'n bepaalde oomblik (gewoonlik
'n gejaagde oomblik) op 'n bepaalde dag. So ook is baie van die
gevoelens van mislukking of skaamte binne-in ons, gekoppel aan 'n sekere
ervaring of 'n spesifieke tydperk in ons lewe. Dit is deel van ons
ervaringswêreld en dit kan 'n probleem word wanneer ons toelaat dat
hierdie emosies ons lewe totaal oorheers en veroorsaak dat hulle
deursypel en ons ganse bestaan begin oorheers. Hierdie emosies hoef en
mag nie ons gevoel van selfwaarde beïnvloed nie!
Selfs ons mislukkings kan ons herinner aan die goeie dinge wat God in
ons ingebou het – jou slegste dag in die jaar, waar jy op jou laagste
voel, moet vir jou 'n aanduiding wees van die sukses wat jy in die ander
364 dae behaal het! As jy suksesvol was en God se hoë standaarde al die
ander dae kon handhaaf, mag die een dag jou nie ontmoedig nie!
Die punt is, ons moet begin om onsself lief te hê. Dit beteken dat ons
moet bou en werk aan ons selfbeeld en selfwaarde – dit beteken egter nie
dat ons arrogant en behep met onsself moet wees nie, maar dit is
noodsaaklik dat ons one eiedunk moet verhoog deur die krag en genade van
God.
As God reken dat ons tot veel in staat is, het die tyd aangebreek dat
ons Hom op Sy Woord moet neem – ons dien 'n groot Skepper wat elkeen van
ons as 'n unieke maaksel geskape het, naamlik na Sy Beeld.
