Daar is soveel definisies van aanbidding as wat daar aanbidders is. Ek het dus die vrymoedigheid om myne ook daarby te voeg: Aanbidding is wanneer alles wat ek is, reageer op alles wat God is. Die woordjie ALLES is vir my die kern van die saak. My persoonlike getuienis is dat ek vir God van kindsbeen af ken, maar dat Hy vir baie jare nie alles van my gehad het nie. Sondes soos trots, minderwaardigheid, eiegeregtigheid en soveel meer, het veroorsaak dat ek ook in my aanbidding 'n verdeelde hart gehad het.

Liewe leser, ek praat reguit omdat daar nie meer tyd is vir enige ander benadering nie. Dit voel beslis aaklig om vir ander te vertel dat jy God nie voluit gedien het nie, veral as jy in die bediening staan, maar lank self vals gesing het! Ek is bereid am hieroor te getuig, omdat dit ons primêre roeping, naamlik om God intiem te ken en Hom te verheerlik, radikaal beïnvloed. Die positiewe aspek van my getuienis is dat die oomblik toe ek ALLES (elke faset van my lewe) vir God gegee het, my belewenis van aanbidding ook grootliks verander het.

Aanbidding was vir my redelik eendimensioneel want ek is 'n musikant en ek het dus grootliks op musiek as aanbiddingsmedium fokus. Ek het min begrip gehad vir mense wat nie vir 'n uur lank vir God liedere kon sing, hande klap en op hul knieë neerval nie. Nadat ek gestroop is van elke bietjie "eie ek" het daar 'n paar wonderlike dinge in my aanbiddingslewe plaasgevind:

Ek het ontdek dat daar soveel meer maniere is waarop ons God intiem kan aanbid as net gebed, Skriflesing en musiek. Daar is persone wat God op terreine aanbid wat vir my totaal onbekend was, en as musikant was dit amper ondenkbaar dat hulle op daardie manier ook naby aan God kon voel. Wat 'n openbaring toe ek uiteindelik gekonfronteer is met die diversiteit van God se skepping!

Die volgende wonderlike gebeurtenis was my ontdekking van die Hebreeuse woord "schacha". Dit is die woord wat in die Ou Testament die mees algemeen vir aanbidding gebruik is en dit kom 170 keer voor. Die betekenis hiervan is om jou uit te strek, neer te gooi, om neer te buig, neer te kniel tot eer van God en om te aanbid. Ek ontdek dat hierdie woord gebruik word wanneer Job die Here aanbid nadat hy ongelooflike slegte nuus ontvang het (Job 1:20—21).

Job het iets van aanbidding en natuurlik vertroue verstaan wat ek nog moet leer. Ek lees nie dat hy vir God kwaad was vir 'n paar maande of jare en na tien beradingsessies stelselmatig weer begin het om God te aanbid nie! Nee, Job schacha direk nadat hy gehoor het sy eiendom en kinders is uitgewis.

Hy gee lof en eer aan God. Net iemand wat geheel en al oorgegee is aan God, iemand wat van ALLES gestroop is, kan dit doen!
Nou is die vraag: Maak ek en jy genoeg geleentheid vir schacha? Natuurlik stel God eerstens belang in ons persoonlike aanbidding in ons binnekamers. Hy is nie verniet 'n "jaloerse God" nie. Kan ons getuig dat ons aanbidding waarlik opreg is en dat God dit as 'n offer beleef? Ek kan jou maar net uitdaag om dit so aan hom te bring. Doen dit onbaatsugtig, want God weet wanneer ons motiewe onsuiwer is en ons net regstaan om seëninge te ontvang. Moet ook nie eers wag tot die grootste lewenskrisis jou tref voordat jy schacha nie. Kom ons doen dit uit dankbaarheid en vanuit 'n rein, onverdeelde hart; dit is in elk geval al waarmee God tevrede sal wees.

Ek kan ook nie anders as om hierdie vraag te vra aan elke Christelike gemeente in ons land nie. Is schacha die tipe aanbidding wat aan God gegee word tydens ons weeklikse samekomste en eredienste? God sê dat Hy in die Iofsange van sy kinders woon. Geniet God dit om by ons te wees as ons hom aanbid? Mag elkeen wat nou hier lees in alle eerlikheid hierdie vraag antwoord, en mag gemeenteleiers besef hoe groot hul verantwoordelikheid is om hul gemeentes volop geleenthede te gee om God met Job se opregtheid te aanbid. Dis opvallend dat Job nie 'n "worship leader", orkes of kerkorrel nodig gehad het om hom te laat schacha nie. Nee, sy geloof, vertroue, toewyding en passie vir die Koning van die konings was genoeg!

Kom ek en jy verbind onsself vandag tot 'n nuwe dimensie van aanbidding: God se dimensie! Kom ons volg die riglyne in Sy Woord en maak seker dat ons besef:

1. Ons omstandighede kan nie die intensiteit van ons aanbidding bepaal nie

2. Egte aanbidding verklaar altyd die waarheid

3. Aanbidding gaan nie eerstens oor ons nie, maar oor God!

Openbaring 1:17 (Boodskap) — "Toe ek Hom sien het ek so klein gevoel voor sy grootheid dat ek net daar voor Horn neergesak het. So magteloos soos die kleinste wurmpie het ek voor Horn bly lê."

Om te schacha sal vanself kom as ons bereid is om soos Johannes, so oor te gee dat ons "magteloos" voor Horn sal lê om gestroop te word van elke bietjie "eie ek".