In die inligtingsera, war ons daagliks oorlaai word met inligting uit
soveel oorde, wil ons dinge dikwels eers verstaan voordat ons dit as
feite kan aanvaar. Deur die jare het ek tot die insig gekom dat die
kragtigste en magtigste geloofsake gewoonlik die sake is wat ons nie kan
bewys met Wiskunde en Wetenskap nie. Dit is dalk juis hoekom God se
Woord oorloop van metafore – woordprentjies – wat ons lesse leer oor die
lewe en geloof. Die beste manier om hemelse dinge op ons aardse maniere
te kan verstaan, is sekerlik deur middel van beelde en metafore, eerder
as grafieke en syfers.
'n Tydjie gelede het ek 'n kursus aangebied, en een van die onderwerpe
vir bespreking was risikobestuur. Hoewel risikobestuur nie 'n presiese
wetenskap is nie, bevat dit wel formules as riglyne om te bepaal of iets
'n risiko is en hoe groot die risiko kan wees. Wiskundiges het met 'n
formule opgekom om hierdie faktore aan te dui. Dit het my laat wonder
hoe 'n wiskundige formule, wat geestelike kwessies kon illustreer, daar
sou uitsien:
Dit het my uitgebring by 'n "vredesformule" wat soos volg uitgedruk kan
word:
Vrede =
Geloof X Geduld
Wanneer ons geloof het, glo ons
onwrikbaar dat God die beste in die lewe vir ons gun en dat Hy, in sy
almag, vir ons sal voorsien en vir ons die nodige deurbrake sal stuur.
Ons glo dat alles ten goede sal meewerk vir die wat Hom liefhet (Romeine
8:28), ten spyte daarvan dat ons nie altyd verstaan presies hoe nie.
Wanneer ons geduld het, begryp ons dat God dinge op sy perfekte tyd doen
(Prediker 7:8) en ons kies om Hom te vertrou, selfs wanneer dinge nie
presies uitwerk wanneer ons dink dit moet nie.
Wanneer ons glo dat God vir ons sal intree, en die geloof vermenigvuldig
met 'n bereidheid om te vertrou dat sy tydsberekening perfek is, kan ons
ophou fokus op ons stres, en ophou om aardse sukses na te jaag. Die
bereidheid om God te vertrou en op Hom te wag, vermenigvuldig met geloof,
bied vir ons die vrede wat alle verstand te bowe gaan. In God werk alle
dinge ten goede mee, maar ons kan kies hoe ons gaan optree in die
tussenfases. Gaan jy 'n lewe van stres en oorlading leef, of kies jy om
jou geloof met jou geduld te vermenigvuldig om sodoende die vrede van
God, wat alle verstand te bowe gaan, te ontvang (Filippense 4:7)? Die
keuse lê by jou.
