Die pogings van Radiokansel en die Onafhanklike Kommunikasie Owerheid van Suid-Afrika (OKOSA) om die geskil oor 'n uitsaailisensie vir 'n mediumgolf sender in die Wes-Kaap buite die hof te skik, het ongelukkig op niks uitgeloop nie en dus sal Radiokansel voortgaan met die hofsaak op 6 en 7 September 2010.

Radiokansel het op die 7de Mei 2009 'n hersieningsaansoek by die Hooggeregshof ingedien om die beslissing van OKOSA te hersien.

Nadat die gemelde aansoek aan OKOSA beteken is, het OKOSA op die 15de Julie 2009 met 'n aanbod vorendag gekom om 'n proses in werking te stel om die aangeleentheid buite die hof te skik.

Verskeie pogings deur Radiokansel om die skikkingsproses op dreef te kry is deurlopend deur OKOSA in die wiele gery en het meegebring dat Radiokansel tot die gevolgtrekking gekom het, dat OKOSA nie in goedertrou optree nie en dat die saak gevolglik, eerder formeel in die hooggeregshof opgelos moet word.

Die hersieningsaansoek van Radiokansel handel met verskeie feite vir hersiening met spesifieke verwysing na die beleid van OKOSA dat Gemeenskapsuitsaaiers geografies gebonde moet wees met hul uitsendings.

Dit word gehoop dat hierdie voortslepende dispuut oor die Wes-Kaapse sender op die 6de en 7de September opgelos sal word, wanneer Radiokansel OKOSA voor die hof daag oor, onder andere, sy volharding met sy verklaarde beleid dat die betrokke mediumgolf sender vir kommersiële gebruik geklassifiseer is.

Radiokansel het ten volle saamgewerk en elke moontlike opsie uitgeput, maar op die uiteinde is dit duidelik dat ‘n aansoek om hersiening in die Hooggeregshof die enigste lewensvatbare opsie is.

Radiokansel wil graag sy lojale luisteraars van harte bedank vir hulle ondersteuning en vra vir opregte voorbidding dat hierdie hofsaak ‘n positiewe resultaat sal oplewer.