|
30 Januarie 2012
Sedert die
nuus van Josie Raath se selfmoord bekend
geraak het, het Radiokansel 'n volledige,
korrekte en feitelike verklaring
gepubliseer. Alhoewel dit op ons
webtuiste geplaas is, dit ook op die
luggolwe was en wyd versprei is aan ons
luisteraars en ondersteuners, het die
sekulêre media, met 'n enkele
uitsondering, verkies om dit nie te
gebruik nie.
Ek gaan Radiokansel nie teen sulke
skeefgetrekte artikels verdedig nie,
want ons het nie nodig om dit te doen
nie. Ons beskik oor die ware feite en
glo dat die waarheid vrymaak en homself
verdedig. Die bestuur van Radiokansel
het deurgaans met integriteit opgetree
en ons het ons bes gedoen om in hierdie
tyd van pyn vir die naasbestaandes en
Josie se drie jong kinders te beskerm
teen vêrdere smart wat deur 'n
moddergooiery veroorsaak kan word. Ons
verkies dat hulle hom sal onthou as hul
pa, "’n goeie man wat nie altyd die
regte besluite geneem het nie" (Soos wat
sy dogter Rhonwyn gesê het). Ongelukkig
deel die media nie noodwendig ons
sentiment nie en soek slegs na sensasie
wat uit die situasie gemelk kan word, al
moet dit beteken dat feite eensydig en
verdraaid aangebied word.
Tog is daar in Rapport van 29 Januarie
2012 'n belangrike stukkie inligting
gepubliseer, nl. die definisie van "bipolêre
stoornisse (sic)" d.w.s. depressie (Bron
genoem: Wêreldgesondheidsorganisasie).
Deur dit te
lees, sal enige regdenkende leser tot
die konklusie kom dat die koerant goed
verstaan dat dit agtergrond vorm vir die
gebeure van die afgelope tyd. Daar word
gestel dat bipolêre depressie o.a.
gekenmerk word deur die volgende: Dis 'n
chroniese siekte (langtermyn), lyers is
aan dieptes van depressiewe fases
onderhewig, en neem dan dikwels
onverantwoordelike besluite, wat ook
interpersoonlike verhoudings negatief
raak, wat op sigself selfvernietigend
kan wees. Selfmoordgedagtes is dikwels
’n kenmerk van sulke depressiewe fases
aangesien die lewe deur 'n donkerbril
gesien word. Die bron stel dit ook dat
hierdie as een van die "grootste
psigiese versteurings ter wêreld beskou
moet word".
Feit is dat Josie 'n selferkende
depressielyer was, wat baie jare met die
siekte geworstel het. Teen hierdie
agtergrond doen ek 'n beroep op ons
luisteraars om die gebeure nugter te
deurdink en te verstaan dat
vernietigende siektes van ons tyd ook
Christene tref. Ons beradingsafdeling
help baie van ons luisteraars wat met
sulke ernstige depressie worstel en
verstaan ook dat depressielyers dikwels
hul vertroue in God verloor en sy liefde
in twyfel trek. Gelukkig kan ons ook
getuig dat God sulke mense wel genees,
normaalweg met die hulp van
Christelik-gefundeerde berading, in
kombinasie met die mediese wetenskap.
Bid saam met ons in hierdie tyd – in
besonder vir hulle wat met n gevoel van
hulpeloosheid sukkel weens depressiewe
gedagtes.
Seënwense,
Dr. Roelf Petersen
Besturende Direkteur
|
