'n Liedjie wat ons as kinders in die Sondagskool gesing het, "It’s love that makes the world go round", laat my ook besef dat die liefde 'n belangrike element is vir almal se voortbestaan op hierdie aarde.

Slegs as ons mekaar onvoorwaardelik aanvaar en liefhet, sal die wêreld sien dat ons dissipels van Jesus is, dit alleenlik sal maak dat hulle Hom ook sal wil aanneem. Ons moet elke dag God se liefde so uitleef dat ons vyande ons voorbeeld sal wil navolg.

Ons almal ken 1 Kor. 13 en kan dit tien teen een opsê, maar die praktiese uitlewing daarvan is belangrik en sekerlik ook baie moeilik. Dit kom nie vanself nie, maar om iemand lief te hê is 'n besluit, wat elke dag geneem en uitgevoer moet word.

Liefde vind ons net in God, want God is liefde. Wanneer jy die Here in jou hart het, kan jy tog nie anders as om oor te borrel van liefde nie.

Kom ons begin vandag om almal lief te hê en om God se onvoorwaardelike liefde uit te straal. "En nou: geloof, hoop en liefde bly, hierdie drie. En die grootste hiervan is die liefde!" (1 Kor. 13:13)