Mattheus skryf: ''n Kanaanitiese vrou...het...by Hom aangekom... [en] aanhoudend geroep: "Here...My dogter is in die mag van 'n bose gees"
...Jesus antwoord: "Ek is net na...Israel toe gestuur. Dit is nie mooi om die kinders se brood te vat en vir die hondjies te gooi nie." "Dit
is waar, Here," sê sy, " maar die hondjies eet darem van die krummels wat van hulle base se tafels afval." "Mevrou," sê Jesus vir haar, "jou
geloof is groot! Jou wens word vervul''' (vv. 22-28 NLV). Hierdie ongelowige vrou was 'n buitestaander, tog het sy deurgedruk en gekry wat
die gemaklikes in die binnekring dikwels misgekyk het. Praat van hindernisse! Eers het Jesus geweier om haar te antwoord. Toe sê Hy: 'Wat Ek
het, is net vir die Jode.' Uiteindelik sê Hy: 'Dit is nie mooi om die kinders se brood te vat en vir die hondjies te gooi nie.' Die meeste
van ons sou erg gekrenk weggestap het. Nie sy nie! Sy het uitgeroep: 'Ontferm U oor my.' Sy het nie gevra wat sy verdien nie, sy het
uitgeroep vir wat sy nodig het! Met die gevolg dat Jesus elke hindernis verwyder het en haar gebed beantwoord het. As jy volhard, sal Hy ook
dieselfde vir jou doen. Inderwaarheid het hierdie vrou vir Jesus gesê: 'Laat die kinders die brood kry, al wat ek nodig het, is die
krummels.' Kerkmense raak so selftevrede dat hulle die brood afskeep, die brood mors, daaroor kla, en soms nie eens kerk toe kom om die brood
te kry nie. Maar desperate mense tel die krummels op en verkry die lewe! Hulle weet as daar krag in die brood is, is daar krag in die
krummels. En as 'n krummel al is wat jy kan kry, is 'n krummel al wat jy nodig het. So, wat het jy vandag van God nodig? Hoe graag wil jy dit
hê?
Sielskos: Deut
14-17;
Mark 10:35-52;
Ps 93;
Spr.
11:30-31 |
